قصبدة / زى ضلفة شيش شعر / السعيد المصرى

دلوقـتى بيطـرح..
فى دراعـك ريـش..
وتـرفـرف..
بـرّه حيـطان الزنـزانه..
بـرّه وشـوش كرمشها الخوف
بـرّه الشـوك..
وإزار السـور
للنـور..
اللى بيخطف روحـك للملكوت
مفـلـوت..
من فـرط عـيـّار النشـوه
خـطـوه ويقفـل..
ورا منك بـاب
خـطـوه وتـفـتح..
قدامك ضلـفة شيـش
خـطـوه وتـخـش..
الحضـره مـريـد..
وتـقيد جواك..
فوانيـس الشـوف
ملهـوف..
يا مـلاك ع الحضـن..
ما اللى جـابوك..
نسيـوك،
وسابوك عطشان..
فاشرب..
من طرف صـوابعى حليب
ما اللى جـابـوك..
زقـوك قـدامـهم..
واترصـوا..
وراك مجاذيب!!