شاعرةٌ تستطيع أن تترجم مشاعرها من خلال صور تعبر عنها ببساطة ويُسر ، مبتعدةً عن التعقيدِ البياني .. وكما قلت :”بطاقة تعارف الشاعر قصيدة” ، هاكم ثلاث قصائد لشاعرتنا .. فقط أحب أن أنوه أنني عندما أنشر للأصدقاء أبتعد تمامًا عن الصورة بمجرد النشر ، تاركًا المجال لكم للتعارف ، فهو الغرض الأساسي من النشر . أسعدكم الرحمن وبارك في لحظاتكم .
في يوم اشتقت لحبابي
خدتني الدنيا في غيابي
ودقة قلبي جوايا
تدِّوب روحي كالشمعة
فتحت البيت
وعشت الذكري جوايا
بشوق وحنين
وروحي كت بتسألني
عن الغايبين
جاوبت خلاص أهم راحوا
وضاعت بينا أحلي سنين
صور ع الحيط
ملانه رماد
وبتودَّع حبايبها
وعارفة الكل فارقها
لقيت أمي بتتكلم من الصورة
بنظرة عينها لعيوني
وحاسة بإني مكسورة
بكلِّمها وتسمعني
وبشكلها من الدنيا
وبحكي معاها عن همي
قالت لي الصبر ع الأيام
وحضنتني بكل حنان
مابين لحظات
ياريت قلبك سمع قلبي
ياريتك كنتي يوم جمبي
ياريت لو بس ترجعلي
تطمني قلبي من تاني
تصبرني علي الفرقة
علي الدنيا اللي وجعاني
واخبي روحي جواكي
وأدَّفي بأنفاسك
واقولك أد إيه ف بُعدك
مافيش ف الدنيا من بَعدك
وأرمي حمولي جواكي
وألقي الجنة وياكي
ياريتك كنتي سمعاني
أنا محتاجه لدفاكي
……………….
حقيقة وخيال
……………
بتلف الدايرة المقفولة
بتحاول تخرج م الواقع
بخيال معكوس غير الصورة
عمال بتحايل في الأيام
بتأدي حياتك في الأوهام
طب تعمل إيه إذا كنت كيان
بيعيش محروق جواك بركان
بداوي جراحك بالنسيان
وبترسم ضحكة تمسحها إيد الأحزان
حتي ام تحب تعيش أحلام
بتلاقي الفرحة المكسورة
طب تعمل ايه ف إنك إنسان
إذا كنت ملاك أو كنت شيطان
حقك م الدنيا تكون موجود
إذا كنت بتصرخ مليون صوت
جواك بتعيش دايما مكبوت
وحياتك تنفع أُسطورة
طب تعمل إيه
لو كنت وحيد
مع إنك ليك إخوات وصديق
قلبك جواك زي الصحرا
وخرابة دايما مهجورة
هتسلم وتعيش في الواقع
ولا نهيتك موتك جواك
من وسط الديرة المقفولة ؟!
……………………….
(جرح السنين)
……………
بلاش يا سنين تعندينا
كفاية علينا مافينا
تعبنا كتير من القسوة
وتاهت بينا خطاوينا
رضينا فيكي بالمكتوب
وقلنا خلاص نعيش ونتوب
وبكرة الفرح يملا قلوب
وننسى جراح ليالينا
مشينا معاكي في المحنة
وحتي الشوك مريحنا
زرعنا الفرحة جواكي
ودبلتي ملامحنا
وحتي نسينا مين احنا
خداعك كل يوم بيبان
وضحكة مزوقة حرمان
ودمعة عين ماليها أمان
تعبنا خلاص من الزينة
بلاش الوش بالمقلوب
ده ياما قلوب عليها دروب
وايام الزمن محسوب
تداري كل شيء فينا
كفاية علينا حبينا
مرار مكتوب على وشوشنا
وجرح القلب صاحبنا
ننام ونقوم بأوجعنا
شقي مكتوب علي جنبنا
عيون بتبص جوانا
ملانا الكسرة حرقنا
عذاب في سنين محاوطنا
وكاس المر دوبنا
رسمت الضحكة بالألون
بلون أبيض ملان أوهام
وعشنا الوهم في نورك
بنضحك ضحكة مغشوشة
وبسمة معطرة زهورك
أتاري الزهر مش زهرك
وحتي الوردي مش لونك
خداع مكتوب معاه شمسك
بنحلم يوم تدفينا
خلاص ضيعتي مالينا
فقدنا أغلي شيء لينا
فقدنا الصدق والإحساس
وكلمة حب تروينا
خلاص ضاعت أمانينا
