واحد محشش اتسأل
ليه قوتك دايما ف دبوس الحشيش؟
ولو مفيش تصبح ضعيف ضايع
ولو صايع فتح لك باب
تفوت وانت كسير الناب
قال المحشش:صنعتى تحكم عليا بالمزاج
مر{ة صاج الفرن محمى امشى شايله فوق دماغى
اجرى الاغى دا ودوا وانسى سنى
واعترف من جوة منى
ان اصغرهم شايفنى
شىء مجرد م الحياة
انسى نفسى
يسقط الصاج من ايديا
لو عليا
كان ف نفسى اقلبه مرة بارادتى
واختفى واهزم مرارتى
وانسى بصة غيرى ليا
بس حالى كان مجرد معركة
ويا الرغيف
لو نضيف
ف السوق ابيعه
لو مكانش
ابات جعان
والامان
كان صنف غالى
اغلى من طقم السنان
سبت شغل الفرن صدفه
بالمصادفة واد قريبى عنده تكس وحس انى ف بهدلة
مد لى البسمة بإيديه
هو يوم علمنى فيه ازاى اسوق
والحقوق ليه تبقى عندى اد ايه
واما رب القوت نصفنى
والفلوس جريت ف ايدى
يومها صمم فيا جرحى
يشترى الفرح الجبان
والشيطان وسوس ف عقلى
اللى كان عن غريب
والطبيب كان ليا شدة او حجر
اشرب واسيب
اصل توب الاصل يحكم
ف العلام ملياش نصيب
اما دينى بعدت عنه ف الحفا
والارصفة
اللى كانت ليا اقرب
حتى من اقرب قريب