يا مدارس ..
نفس الريحه ..
التُخَت ..
حزام المريله ..
كيس السندوتشات ..
الديل الورق ..
الكتابه علي ..
قيشاني الحمامات المدغدغ ..
ب سنون البراجل ..
و ضوافر القلق ..
من نسيان الواجب ..
سُور المدرسه الشاهد ..
علي قطع البنطلونات ..
من أول ..
فتح الرجل علي الآخر ..
لزوم النط ..
لخربشة حد القزايز ..
الملزوقه ف أسمنت السُور ..
كَتَافة الشرطه العسكريه ..
و الباريه ..
إنضباطنا لما حيينا العَلم ..
عَرَق إنكب من تحت فروة راسنا ..
شرح حدود المعرفه ..
و اللي مفروض ينعرف .
__ فوق ف الحصص __
سندوتش الصبح ..
بيفكرني بحصص الجغرافيا ..
و الأطلس الوهمي ..
و كتاب التاريخ المزيف ..
عريانه الحقيقه ..
ف وش أستاذ التاريخ ..
خجلان إنه مُرغَم ..
رغم إنه مش مؤمن ..
ب الموجود ف الكتاب ..
فواصل حدود ..
واقفه ما بيني و بين ..
جِلدِة كتاب القوميه العربيه ..
حصص الترفيه معروفه ..
ألعاب و نجاره و رياده ..
و قوميه عربيه .
__ مينقال __
حاجز وهمي ..
واقف بيني و بين ..
أوضة الموسيقا ..
كنت بخاف ..
إني بخبط علي بابها ..
ف يخرج لي مارد جهوري ..
يقولي السِلم الموسيقي ..
بصوت أوبرالي ما بفهمهوش ..
مع إني ..
متربي علي أقدم بُم (*)..
ف عود ..
نزلت علي صدري الطري ..
و وصلت لخلايا مُخي البهتانه ..
ف حركت مراكز الكلام ..
و انفلت من بين شفايفي ..
كلمه محبوسه و صادقه .. مين قال المزيكا حرام .
__ أستاذ طلعت __
إنت واقف ليه ف الطُرقه ..؟
قالهالي ..
و هوه بيخبط بطن إيده ..
علي سقف دماغي .
