الشاعر الكبير/ أحمد لمسيـَّح (المغرب)
علمني البحر نحلم :
مديت يدي لموجة منه – حجبتني عليه
كانت هي لبحر كله
……..
عطيت بالظهر و ” انا ” نفيقو
سكرتني موجة :
حلَّت الموجة سوالفها / كنت رمل سترتني برقصتها
سكرتني بايزار ماها
غارت في اعماقي – ناشف
تغزلت الطيور
فقت من تحت إيزار الما … ” فاقد الذاكرة ”
موجة وشمة في الما :
موجة وشمة في الما / طرزت قفطانو
الليل سلهام جمعها مع الرمل
خلى الظلام يقشـَّـر السـر
رمل شاعل وموجة طافية
تمحاو لمَّـا الضو شعل .
الحيرة نعمة للسالك :
سعدات من حار وجات موجة علامة في طريقو
سعدات من حيرو البحر وسقاتو الموجة خمر
سعدات من حار حتى ما لقاش راسو
سعدااااات من حار
عراتو موجة من الداخل وزادت حيرتو
سعدات من حار في بحرو وما رجعش
موجة منفايَ :
مشيت منِّـي وما لقاني غير ظلي
كذبت على راسي ولمَّـا غرقت لقاني
………
نسيت راسي في موجة
وما بغيتـش نطلع من غرقي .
مشات منِّـي :
كانت دواخلي معرّيها الضو وسَتـْرتها موجة
قالت لي ماتسألـش وخَلّيك غايب :
انتَ ما كاينش …” رمل ” حاني .
………
قلت : نطـْفيني في ظلي و ….
ربّيت الوَهْم في الضو … جاني في الظلام عرّاني
فَيـَّق السر ومْحاني .
موجة في البرزخ :
موجة مترددة قدامها ضباب
ووراها ريح ” معاقة ”
والرمل حاضن نوارة الجمرة :
- غاتجي مع المد
ماغا تجيش
…….
القمر بدَّل شوفتو في الأرض
مابقى جزر ولا مد .
موجة في شوفتي :
زولت شوفتي وبقات موجة فيها
سمعت موَّالها وتَّسْكـنْـت
فقت ، تخيلْتْ راسي حنة في يديها
عنواني في كاس موجة :
موجة فتحت كتاب – حروفو نور
ومدّيت يدها لكاس السر
تمنيت نكون عنواني في كاسها
……….
ــ خليك موجة خمر
وخلي الرمل سكران بك
يحلم ما يفيق
حاير
بين العمى والنور حيرة
اليقين يعمي
والموجة تضوي الحيرة
سال بسكاتك واقرَ النظرة
سافر بِها لِك .
…….
شميت المعنى بين ضباب البحر وشعا لفجر
( مدﭭدﭭ بالتبراع )
معمي بالعشق – نشوف به
آمنت بالسر : يخفى ما يطير
آمنت بحماق هذاك ” اللي ما كاينش ”
قدام جذبتو الدخلانية موجة حايرة
……….
وصّيت الكلام وعطّـرت غناه
بسيرتي سقيت الخَيال ، مدِّيت لغتي تحت ” المشنقة ”
لمّا خيال ظلك بدا يحير
كانت الحلمة انتِ…. كـتبة و القلم كان مفتاح في البير .
ميت أنا بين يديك
وعينيك للسما بدات تشير
كنتِ بين غابات الضو
والخَيال كان لك سرير
حماني منِّي وحصلني فيك
…………
دمعت النجمة … تجرح الظلام … زغردت الشمس
طاف مالْ كي سمايا ، رشها بالنور
في السحابة خلوتك
وانا بلا جناوح بغيت نطير .
مكتَّـف بضوَّك :
ننزل مَنّي ملحَّف الظلام ، يمحيني الضو ونبقى فين وصلتْ مشلول
ياموجة وصلي – صلّي عليك الأمان ، الرمل مسالم .
ياموجة جايك النهار اعمى والرمل عكاز
صوني حلمو- راقد في رحم الضو
المحبة بحر من النور يطهر الكون
إيلا كانت موجة جناحو
ياموجة ….
الرمل بريح هواه سابق ” قانون ” الطبيعة يعانق موجتو …. ينتحر في شونها
قال الرمل : موجة إيزاري
هي وحدة تتحرك في العالي
وانا واحد ومشتت / تنحتني وتخفى
الرمل مُسالم / والموجة فارس / السرج كان محبة / والفرس كان ريح
كان حلم / موجة ورمل / حرام نفيقو منـُّـو
ما قدرش الرمل يعترف لموجة وهي حاضناه – سكران بها
يا بحر كن لي موجة في رملي تسرح
قال الرمل : مشيتي مني وما نشفتش منك
***