قصيدة ( هنومة ) شعر / تامر انور

بذكريات كتير عن هنومة

اللى أنت معلق صورها ف كل حتَّة ع الحيطة

الكل كان بيسأل:

                انت ليه أخترت الدور ده؟!

مع إنك لو أبو سريع

                         كنت هتعمل كل اللى ف نفسك

-طبعا-

    حاتقول إن انت اخترت الدور الأصعب

ثم قناوى.. هوَّ بطل الفيلم

-و الحقيقة-

          هنومة هىَّ اللى بتوزَّع الأدوار

ماهو مش معقول حاتسيب فريد..و تحبك

مع إنك مديها الكردان و الديوان

اللى ورثتهم عن مشاعرك اللى ماتت

واضح جدا

          إن البنات اللى اسمها بيبتدى

بحرف ال هه

          بيكون وجودهم مرتبط بالمصايب

هنومة, هند رستم,….

حتى هيلين فى الإلياذة

               كات سبب الحرب

“ليت هنداً أنجزتنا ما تعد”