قصيدة كيان مفتوح شعر / ابراهيم منصور

عايش
علي طقِّتين م الخجل .،
والبوح ..
و بتشرب النسيان
و بتقْصِر الحلم بسُكاتك..
لما تِملاك الهموم.
قافل عليك جفنك ..
و موَلِّي وشَّك ناحية الجاي،
بس رجليك…زي ما تودي الرياح.
مفتوح كيانك _للعابرين_ شارع
انت لسة ماعديتوش.،
وبترمي حِملَك في الطريق
يكعبل الداخل .. ويوصَّل الخارجين.
بتلملم الشارع
مابين املك.. وبين الناس،
وتفرد المسافات..
بينك وبين.. ضلَّك.
طاوعت قلبك لما وسوسلك،
وخاصمت ضلَّك لما وشوشلك
تكون.. نفسك.
مش بعرَفَك…!
عينك بلون الحِداد.. ولَّا رايات الخطر.،
دايما.. حذِر
بتفتش الداخل لقلبك
و لولا شُرْبَكْ تكتشف…
خجلك..
ماهوش مُسمِن ،
ولا بُوحَك
غَنَاك
من جوع.