إحنا مش أول وجع ولا احنا نهاية الأحزان ولا حل حتمي ومحتمل
لعودة الروح في المكان
إحنا فرسان المدينه الطيبه
وضحكة العواجيز
وبراءة الأحلام
وأسباب الحقيقه
إحنا شيوخ
ملهاش طريقه
فينا حد
همه في رجوع الخلافه
بأي حد
وحد
همه في حدود المكان والأرض
وحد ..
زي شربات المورد
لوعشق
يعشق بجد
ولوحزن
بيموت بجد
إحنا اختلفنا زمان
على شكل الغنا
والنهارده بنتفق على بردالمكان
إحنا عمدان العماره المايله
على صدرالنهار
واخدين قرار
الرقص فوق جسرالدهب
والصعلكه على أي شط
وان كان حمام الغيّه بط
ممكن نطلع م الفراخ زغاليل
أمّاا للي نزلوا في الميدان
رافعين صور ..
وبيهتفوا : آسفين ياريس
دول مش شبهنا
ومش جيرانا
ومش صحابنا
ومش ولاد التمرحنه
أما احنا وولاد الحلال
زي البنفسج
لما بيطلع بين عيدان الفل
في نهاية الربيع فرحان
زي الملايكه لما تنزل م السما
بآيات من القرآن
إحنا أجمل صوره وسط ألبوم الصور
إحنا بشر
بنحب مصر
وبنراهن على الإنسان
