شارع مرصوف بالدم
علاء عيسى
متحزم
بحزام اليأس
والجسم نحيل
خايف تسقط مني
مشاعري
وحد يشوفها
باداريها
بأفكار متفائلة
… لحد ما
وكلام ….
مش قادر يقنعني
بحروفه الـ مش مفهومة
فكرت أغيّر جلدي
وألبس وشين على وشي
ولمحت بعيني ..
ضحك معلق
في الفتارين
دوَّرت ما بينهم
على ضحكة
تنفع تتركب
على وشي الدبلان
بملامحه الـ مش
مقبولة
… قاعد مقنع جدا
بالتكشيرة اللايقة
عليه .
وندهت عليه
وسألته :
سعر الضحك بكام ؟
فتشني ..
فصعبت عليه
مد إيديه ..
وْخد من وشه حتة تكشيرة
ورماها في وشي
وبقدرة قادر
لقتني معلق في الفتارين
وأنا ماشي
بانقط
وباسقط
دمي
في قلب الشارع
#علاءعيسى
من ديوان ” ولى فيها مآرب أخرى ” الهيئة العامة للكتاب 2017