بافك الشفره بروحى

شعر/السعيد المصرى

يــاااه ه..
ولسه بتنـزف…
فى كوباية زبادى..
مكتوب عليها اسمـك
بتقـول إيـه:..
الممـرضـه..
هتنـزل بيها المعـمـل
صـوتك مبحـوح كده لـيه؟
دا باينـك..
نـزفت كتير من زورك
شـاور..
وهاحـاول..
أفـك الشفـره بروحـى
دا احـنا الاتنـين واقفـين..
على كـوبرى قـديم ومصـدّى
اللى هيحـدّف نفسـه..
هـيـّجُـر التـانـى وراه
……………………….
………………
بتقول: إيـه.. إيـه..
الأرض..
الأرض شراقـى..
وعــيدان الرجـله..
والجعضيض والسِـعــد..
ماصـين دم الـزرع الدَبـْلان
وإيد الفــاس المقـووسه..
بعتالك بوسـه فى كفى
ودَكـر التـــوت..
والجمـيزه البـاط..
حـالفـين ما يهـز فـروعـهم
غـير شخطـة صـوتك
……………………….
………………
بتقول: إيـه.. إيـه..
إيـه.. إيه..
أمـى..
أمـى سايبها بتنـزف
بتدبّق ريحـة عـرقك..
من جـلاليبك..
م المـلايات الـزرقه
ملمـوم حـواليها..
بناتك وعيّـالهم
اللى أنا خالـهم الوحـيد
……………………….
………………
بتقول: إيـه.. إيـه..
إيـه.. إيه.. إيه
عيـّـالى..
الـواد «فتـحـى»..
جاب باكو البسكوت..
فى الفُسـحه..
ونشف راسـه..
لا يبعتهولك ويـّّايـّّا
و«عــادل»..
اخـدته الغيـط امـبارح
خـش الأوضـه ينعكش..
ع الرُبـع جـنيه المخـروم
و«محـمـد»..
سـايبه بياكل رز ولـبن
ويـّا المـلايكه..
وبيضحك
دا كل ما يضحك..
أمـه بتنـزف جـوايا..
وبانـزف جـواها
……………………….
………………
بتقول: إيـه.. إيـه..
إيـه.. إيه.. إيه
إيه..
عـايز تكتب..
وصيـتك
ديـونـك
نقــوط
جـواب تأمـين..
عــناوين المـرضـى زمـايلك
اسم وتليفـون الدكتور..
اللى بيشـبه لك من بـره
أول حـرفين من اسمـى واسـمك
على سـيراميك حـمام..
مستشفى «الصدر»
شـريط مضـاد حـيوى..