البنت اللى بتطلع من ريحة المانجة
بتوصلنى على بعد آلاف الأميال
تقلب روحى جنينه
رجلى نخلتين طارحين أبريم
دراعاتى شجره توت بتقابل شجره صفصاف
مناخيرى غيط نعناع
وودانى فراوله بتتدلدل على خدى الخوخ
دقنى نجيل مروى
زورى حنفيه مايّه بتروى بدنى أغانى
البنت اللى بتطلع من ريحة المانجه
رغم التكشيرة
وعيونها السودا
عصبيتها الزايده عن حد فواكه الأرض
بتخلينى كمنجه
بتنوّر كل ضلام الأوضه
وأطير
ريحة مانجه
بتبوس مانجتها
أتبحطر
أبقى عصير مانجة
مغرّق كل الأرض